والأزمات الطاحنة تأخذ بتلابيب البلاد والجميع في حيرة من أمرهم وقد انسدت الأبواب وانقطعت السبل ينتظرون رحمة السماء لانقشاع سحائب الندرة والغلاء وانحدار العملة الوطنية )اليوماتي(، في ظل هذه المصائب والمساغب والـ )الوكسات( يطل علينا عبر أجهزة الإعلام المقروء والمسموع من آن لآخر ذلك الرجل المثير للجدل }بلة الغائب{ ليزيد من التهاب )مرارتنا( بتنبؤاته ﺍﻟﺘﻲ ﻳﻄﻠﻘﻬﺎ على الهواء والتي تصب )حسب ما يمتلك من قدرات يدعيها( في وقوف )الجن الأحمر( مع قادة البلاد ويكشف لنا عن مقدرة ذلك )الجن( على كشف الدفائن والكنوز وآبار النفط التي في باطن الأرض )جن جيولوجي(، فالرجل يؤكد دوماً في لقاءاته بأن هنالك ﻧﻔﻂ ﻓﻲ ﺍﻟﺴﻮﺩﺍﻥ )ﻋﻠﻰ ﻭﺷﻚ ﺃﻥ ﻳﺴﺘﺨﺮﺝ( ﻓﻲ ﺍﻟﻤﻨﻄﻘﺔ ﺍﻟﻤﻤﺘﺪﺓ ﻣﻦ ﻣﺪﻳﻨﺔ ” ﺳﻮﺍﻛﻦ” ﻭﺣﺘﻰ ﺍﻟﺤﺪﻭﺩ ﺍﻟﻤﺼﺮﻳﺔ وكذلك )ﻏﺎﺯ( في منطقة )بورتسودان( ﺑﻜﻤﻴﺎﺕ ﻏﻴﺮ ﻣﻮﺟﻮﺩﺓ ﻓﻲ ﺃﻱ ﺩﻭﻟﺔ ﻣﻦ ﺩﻭﻝ العالم، بل الرجل يدعي أنه يعلم بحقول نفط وغاز لا تعلمها الحكومة ولا )شيفرون( ذاتا!
ليس هذا فحسب، بل يتبرع بتحديدها )بس الناس تحفر ساي( قائلاً إنها تبدأ ﻣﻦ ﺣﻔﺮﺓ ﺍﻟﻨﺤﺎﺱ ﻭﺣﺘﻰ ﺍﻟﺤﺪﻭﺩ ﻣﻊ ﻣﺼﺮ ويذهب الرجل أبعد من ذلك مصرحاً بأن هنالك )ﻛﻨﺰ( من الذهب ﻳﻜﻔﻲ ﺍﻟبلاد ﻟﻤﺪﺓ )300( ﻋﺎﻡ يوجد في ﺟﺒﻞ ﻣﻮﺟﻮﺩ ﻓﻲ ﺟﻨﻮﺏ ﻛﺮﺩﻓﺎﻥ ﺍﺳﻤﻪ “ﺃﺑﻮﺗﻮﻟﻮ” وهو كنز ﻳﺤﺘﻮﻱ ﻋﻠى ﺍﻟﻴﻮﺭﺍﻧﻴﻮﻡ ﻭﺍﻟﺬﻫﺐ ﻭﺍﻟﺰﺋﺒﻖ ﻭﺍﻟﺤﺪﻳﺪ )ولد دا(!!
ويعترف )بلة( في أحد اللقاءات بأنه )ﻣﺨﺎﻭﻱ ﻣﻠﻮﻙ ﻣﺴﻠﻤﻴﻦ ﻣﻦ ﺍﻟجن( الذين يمكن أن يستفاد منهم بتسخيرهم ﻟﺨﺪﻣﺔ ﺍﻟﺴﻮﺩﺍﻥ، بل قطع )شيخ بلة( أن بإﻤﻜانهم ﺃﻥ ﻳﺴﺘﺨﺮﺟﻮﺍ ﻛﻞ ﺧﻴﺮﺍﺕ ﺍﻟﺴﻮﺩﺍﻥ ويجعلوا منه رقماً تقتصادياً خطيراً!
ما أن تنتهيت من قراءة هذا الحوار الذي أجرته إحدى الصحف في وقت سابق مع هذا )البلة( حتى وجدت نفسي أخاطبه:
• طيب يا بلة يأخ يهون عليك والناس )مزرورة( ومزنوقة جنس الزنقة دي وإنت ماسك )جنك( عليك ؟ يا أخي بس رسل لينا )كتيبة جن( واااحدة تطلع لينا )كم ألف طن دهب( وتكتشف لينا خمسمية ستمية بير بترول وكم حقل غاز كده!
• هسه يهون عليك يا بلة جنس النحنا فيهو ده؟ والشلهتة العايشين فيها دي ؟ وجنك قاعد ساااي لا شغلة لا مشغلة؟
• ياااخ نحنا خلينا.. )قيادة البلد دي( إنتا ما بتحبها وبتساندا )وبتكسر ليها تلج( يرضيك تخليهم مجهجهين جنس الجهجهة دي ما عارفين يعملوا شنوو والدرب رايح ليهم؟
• إنتا يا )بلة( وكت عندك الحل ساكت ليه؟ يعني ما شايف صفوف الرغيف ولا ما جايب خبر صفوف الجاز ولا ما عارف أزمة السيولة؟
• يرضيك يا بلة نحنا )نمد قرعتنا( لليسوي وللما يسوي ونقول يا أبو مروووة وكل يوم )ناسنا( في بلد؟
• إنتا يا )بلة( ما عندك وطنية؟ ما زول وطني؟ زول عندو )جن أحمر( ويقعد يربع إيدينو ويعاين للشعب ده بيعاني جنس المعاناة دي؟
• خليك من الشعب يا )بلة( إنتا )معتز( ده ما )حننك(؟ قلبك ده ما فيهو رحمة ولااا شفقة؟ يرضيك الراجل )يغرد( غالبو البسويهو وإنتا تتربع على قيادة جيش من الجن )الأحمر كمان(؟ ياااخ رسل ليهو )مساعد جان( إن شاء الله يحل ليهو مسألة )الرغيف بس(؟
• يا بلة ياخ )خليك واضح يا جميل( لو عندك أي شروط عشان )جنك ده يساعدنا( قولا.. ما تخجل
الناس الشايفا دي كوووولها دخلت القصر )بي شروط( مساعدين ووزراء ووزراء دولة وولاة.. ديل كووولهم كانت عندهم شروط.. فما تخجل مساعد نديك .. وزير نديك .. وزير دولة نديك.. سفير نديك.. فريق برضو نديك.. المهم يا )بلة( حلنا من الورطة النحنا فيها دي !
• وكمان يا )بلة( لو عاوز )الشغل ده( يكون بالنسبة ما في مشكلة، تشيل إنتا و)جنك( نسبتكم وتدينا نسبتنا بس لو لقيتو نسبتكم ناقصة شوية كلم الجن بتاعك ما يزعل لأنو نحنا عندنا جن هنا يقول للجن العندك شنووووووووووووو!!
كسرة:
قمنا بعرض الأمر على )بلة(.. يبدو أننا نسير في الاتجاه الصحيح !
• كسرة ثابتة )قديمة(:
أخبار ملف خط هيثرو العند النائب العام شنو؟ 103 واو – )ليها ثماني سنين وسبعة شهور(؟
• كسرة ثابتة )جديدة(:
أخبار تنفيذ توجيهات السيد الرئيس بخصوص ملف خط هيثرو شنو؟ 62 واو )ليها خمس سنين وشهرين(.
