ﺩﻣﻮﻉ ﺍﻟﺮﺟﺎﻝ

ﺻﺒﺎﺣﻜﻢ ﺧﻴﺮ

ﺩ ﻧﺎﻫﺪ ﻗﺮﻧﺎﺹ
ﺩﻣﻮﻉ ﺍﻟﺮﺟﺎﻝ

ﺍﺭﺳﻞ ﻗﺎﺋﻼ .. ‏( ﻳﺎ ﺩﻛﺘﻮﺭﺓ ﺍﻛﺘﺮ ﻣﻦ ﻛﺪﺍ ﻧﻌﻤﻞ ﺷﻨﻮ ؟ ﺍﺑﻨﻲ ﺍﺟﺘﻬﺪﺕ ﻣﻌﺎﻫﻮ .. ﻣﻦ ﺻﻐﻴﺮ ﻛﺎﻥ ﺷﺎﻃﺮ ﻭﻣﺎ ﺍﺣﺘﺎﺝ ﻟﻰ ﻣﺪﺭﺱ ﺧﺼﻮﺻﻲ .. ﻭﺩﺧﻞ ﻣﺪﺭﺳﺔ ﻧﻤﻮﺫﺟﻴﺔ ﺑﻤﺠﻤﻮﻉ ﻛﺒﻴﺮ ﺟﺪﺍ .. ﻣﺒﺴﻮﻃﻴﻦ ﺍﻧﺎ ﻭﺍﻣﻪ .. ﺍﻟﻮﻟﺪ ﻣﺎ ﺍﺗﻌﺒﻨﺎ ﺍﺻﻠﻮ ﻭﻋﺎﺭﻑ ﻇﺮﻭﻓﻨﺎ ﻧﺤﻦ ﻣﻮﻇﻔﻴﻦ ﻋﻠﻰ ﻗﺪﺭ ﺣﺎﻟﻨﺎ .. ﺍﻣﺘﺤﻦ ﺍﻟﺸﻬﺎﺩﺓ ﺍﻟﺴﻮﺩﺍﻧﻴﺔ ﻭﺟﺎﺏ ﺩﺭﺟﺔ ﻋﺎﻟﻴﺔ ﻭﻗﺒﻠﻮﻫﻮ ﻓﻲ ﺟﺎﻣﻌﺔ ﺍﻟﺨﺮﻃﻮﻡ ﻓﻲ ﻛﻠﻴﺔ ﻣﺮﻣﻮﻗﺔ .. ﻟﻤﺎ ﺟﻴﻨﺎ ﺍﻟﺘﺴﺠﻴﻞ ﺍﻛﺘﺸﻔﻨﺎ ﺍﻥ ﺭﺳﻮﻡ ﺍﻟﺪﺭﺍﺳﺔ ﻟﻠﻘﺒﻮﻝ ﺍﻟﻌﺎﻡ 8000 ﺟﻨﻴﻪ .. ﺗﻤﺎﻧﻴﺔ ﺍﻻﻑ ﺟﻨﻴﻪ ﻳﺎ ﺩﻛﺘﻮﺭﺓ .. ﺍﻟﻨﺎﺱ ﺩﻱ ﻗﺎﻳﻠﻨﻬﺎ ﺑﺴﻴﻄﺔ؟ .. ﺍﻧﺎ ﻭﺯﻭﺟﺘﻲ ﻟﻮ ﻟﻤﻴﻨﺎ ﻣﺮﺗﺒﺎﺗﻨﺎ ﺍﻻﺗﻨﻴﻦ ﻳﻤﻜﻦ ﻣﺎ ﻧﻘﺪﺭ ﻧﻜﻤﻞ ﺍﻟﺘﻤﺎﻧﻴﺔ ﺃﻟﻒ .. ﻃﻴﺐ ﻗﻮﻝ ﻧﺪﻓﻌﻬﺎ ﻧﺎﻛﻞ ﺷﻨﻮ ؟ ﻧﺠﻬﺰﻭ ﻟﻠﺠﺎﻣﻌﺔ ﺑﻲ ﺷﻨﻮ ؟ ﻗﻠﻨﺎ ﻧﺴﺘﻠﻒ ﻗﺮﻭﺵ .. ﻣﻨﻮ ﺍﻟﺒﺪﻳﻨﻚ ﺍﻟﺰﻣﻦ ﺩﺍ؟ .. ﻟﻮ ﻟﻘﻴﻨﺎ .. ﺍﻟﺴﺪﺍﺩ ﻛﻴﻒ ؟ ﺍﻧﺎ ﻛﺘﺒﺖ ﻟﻴﻚ ﺍﻟﻜﻼﻡ ﺩﺍ ﻣﺎ ﻋﺸﺎﻥ ﻭﻟﺪﻱ ﺑﺲ .. ﻻﻧﻲ ﻋﺎﺭﻑ ﻛﺘﻴﺮ ﻣﻦ ﺍﻷﺑﺎﺀ ﺍﻟﻔﺮﺣﻮﺍ ﺑﻲ ﻗﺒﻮﻝ ﺍﻭﻻﺩﻫﻢ ﻓﻲ ﺟﺎﻣﻌﺔ ﺍﻟﺨﺮﻃﻮﻡ .. ﻫﺴﻪ ﺑﻀﺮﺑﻮﺍ ﺍﺧﻤﺎﺱ ﻓﻲ ﺍﺳﺪﺍﺱ ﻋﺸﺎﻥ ﺭﺳﻮﻡ ﺍﻟﺪﺭﺍﺳﺔ … ﻭﺍﻟﻠﻪ ﻳﺎ ﺩﻛﺘﻮﺭﺓ ﺍﻭﻝ ﻣﺮﺓ ﻣﻦ ﻭﻓﺎﺓ ﻭﺍﻟﺪﻱ .. ﻟﻘﻴﺖ ﺩﻣﻮﻋﻲ ﺑﺘﻨﺰﻝ ﻏﺼﺐ ﻋﻨﻲ .. ﻷﻧﻲ ﺣﺴﻴﺖ ﺍﻧﻲ ﻋﺎﺟﺰ ﻗﺪﺍﻡ ﻭﻟﺪﻱ ‏) ..
ﺍﻧﺘﻬﺖ ﺭﺳﺎﻟﺔ ﺍﻻﺏ ﺑﻌﺪ ﺍﻥ ﺍﺳﺎﻝ ﺩﻣﻮﻋﻲ ﺃﻳﻀﺎ .. ﻣﻌﻘﻮﻝ ﺍﻟﺒﺤﺼﻞ ﺩﺍ ؟ ﺍﺻﺤﺎﺏ ﺍﻷﺑﺮﺍﺝ ﺍﻟﻌﺎﺟﻴﺔ ﺍﻟﺬﻳﻦ ﻳﻔﺮﺿﻮﻥ ﺍﻟﺮﺳﻮﻡ ﺍﻟﺒﺎﻫﻈﺔ ﻫﺬﻩ .. ﻣﺎ ﻋﺎﺭﻓﻴﻦ ﺍﻥ %90 ﻣﻦ ﺍﻟﺸﻌﺐ ﺍﻟﺴﻮﺩﺍﻧﻲ ﺗﺤﺖ ﺧﻂ ﺍﻟﻔﻘﺮ؟ ﺍﻟﻨﺎﺱ ﻣﺎ ﺑﺘﺼﺪﻕ ﺍﺑﻨﻬﺎ ﻳﺘﻔﻮﻕ ﻭﻳﺘﻢ ﻗﺒﻮﻟﻪ ﻗﺒﻮﻝ ﻋﺎﻡ … ﻳﺘﻨﻔﺲ ﺍﻷﺏ ﻭﺍﻻﻡ ﺍﻟﺼﻌﺪﺍﺀ .. ﻟﻜﻦ ﻓﺮﺣﺘﻬﻢ ﻻ ﺗﻜﺘﻤﻞ .. ﻟﻴﻪ ﺑﺲ ؟ ﺣﺰﺏ ﻫﺎﺩﻣﻲ ﺍﻟﻠﺬﺍﺕ ﻣﻮﺟﻮﺩ .. ﻛﻴﻒ ﻳﻌﻨﻲ ﺭﺳﻮﻡ ﺩﺭﺍﺳﺔ ﻋﺎﻟﻴﺔ ﻛﺪﺍ ؟ ﻣﺶ ﻛﻔﺎﻳﺔ ﺍﻥ ﺍﻟﻘﺒﻮﻝ ﺍﻟﺨﺎﺹ ﻇﻞ ﻳﺘﻤﺪﺩ ﻣﻦ %25 ﺣﺘﻰ ﺻﺎﺭ %50 ؟ .. ﺍﻻ ﻳﺮﻓﺪ ﺍﻟﺠﺎﻣﻌﺎﺕ ﺑﻤﺎ ﻳﻜﻔﻲ ﻣﻦ ﺍﻣﻮﺍﻝ .. ﺣﺘﻰ ﺻﺎﺭﺕ ﺍﻟﺠﺎﻣﻌﺎﺕ ﺗﻨﺎﻓﺲ ﺍﻟﻤﺤﻠﻴﺎﺕ ﻓﻲ ﺍﻟﺠﺒﺎﻳﺎﺕ ؟؟ .. ﻭﻭﺻﻞ ﺍﻻﻣﺮ ﺣﺘﻰ ﺍﻟﺠﻤﻴﻠﺔ .. ﺩﺭﺓ ﺍﻟﺠﺎﻣﻌﺎﺕ !! … ﺣﺘﻰ ﺍﻧﺖ ﻳﺎ ﺑﺮﻭﺗﺲ ؟؟ ﻳﻤﺸﻮﺍ ﻭﻳﻦ ﺍﻟﻨﺎﺱ ﺩﻳﻞ ؟؟ ﻳﻘﺒﻠﻮﺍ ﻭﻳﻦ ﻭﻳﺤﻜﻮﺍ ﺍﻟﻮﺟﻌﺔ ؟؟ ﻻﺣﻆ ﺍﻥ ﺭﺳﻮﻡ ﺍﻟﺪﺭﺍﺳﺔ ﺗﺪﻓﻊ ﻟﻠﺠﺎﻣﻌﺔ .. ﻭﻻ ﻳﺰﺍﻝ ﺍﻣﺎﻡ ﻫﺬﺍ ﺍﻷﺏ ﺗﺮﺣﻴﻞ ﺍﺑﻨﻪ ﻭﻣﺼﺎﺭﻳﻒ ﺍﻟﻴﻮﻡ ﻭﺍﻟﻤﻼﺑﺲ ﻭﻏﻴﺮﻫﺎ ..
ﺍﻟﺮﺳﺎﻟﺔ ﺍﻋﻼﻩ ﺣﻮﻟﺘﻬﺎ ﺍﻟﻰ ﻓﺎﻋﻞ ﺧﻴﺮ ﻳﻬﺘﻢ ﺑﺎﻋﺎﻧﺔ ﺍﻟﻄﻼﺏ ﺍﻟﻤﺘﻌﺴﺮﻳﻦ ﻣﺎﺩﻳﺎ .. ﺗﻜﻔﻞ ﺑﻤﺼﺎﺭﻳﻒ ﺍﻟﻄﺎﻟﺐ ﺍﻟﻨﺠﻴﺐ .. ﺑﻞ ﻭﻋﺪ ﺑﻜﻔﺎﻟﺘﻪ ﺣﺘﻰ ﺍﻟﺘﺨﺮﺝ ﺍﻥ ﺣﺎﻓﻆ ﻋﻠﻰ ﺫﺍﺕ ﺍﻟﺘﻔﻮﻕ .. ﻟﻜﻦ ﻫﺬﺍ ﻛﻤﺎ ﻗﺎﻝ ﺻﺎﺣﺐ ﺍﻟﺮﺳﺎﻟﺔ ﺣﻞ ﻓﺮﺩﻱ .. ﻭﺍﻟﻤﻔﺘﺮﺽ ﺍﻥ ﺗﻜﻮﻥ ﻫﻨﺎﻙ ﺣﻠﻮﻝ ﺟﺬﺭﻳﺔ ﻋﺎﻣﺔ ﻟﻠﺠﻤﻴﻊ .. ﺗﺤﺴﻢ ﻫﺬﻩ ﺍﻻﻣﻮﺭ ﺍﻟﺘﻲ ﺍﺩﺧﻠﻬﺎ ﺍﻟﻌﻬﺪ ﺍﻟﺒﺎﺋﺪ ﻭﻫﻲ ﺛﻘﺎﻓﺔ ﺍﻻﺗﺠﺎﺭ ﻓﻲ ﻛﻞ ﺷﺊ ﺣﺘﻰ ﻓﻠﺬﺍﺕ ﺍﻻﻛﺒﺎﺩ .. ﺧﻄﺮﺕ ﻋﻠﻰ ﺑﺎﻟﻲ ﻓﻜﺮﺓ .. ﻟﻤﺎﺫﺍ ﻻ ﺗﻮﺟﺪ ﻣﻨﺢ ﻭﻛﻔﺎﻻﺕ ﻟﻠﻤﺘﻔﻮﻗﻴﻦ ﻭﻻﺻﺤﺎﺏ ﺍﻟﻤﻮﺍﻫﺐ ﻭﺍﺻﺤﺎﺏ ﺍﻻﺣﺘﻴﺎﺟﺎﺕ ﺍﻟﺨﺎﺻﺔ ؟ ﻟﻤﺎﺫﺍ ﻻ ﺗﻮﺟﺪ ﻣﻨﺢ ﺑﺎﺳﻢ ﺭﺟﺎﻝ ﺍﻻﻋﻤﺎﻝ ﺍﻟﺴﻮﺩﺍﻧﻴﻴﻦ .. ﻟﻤﺎﺫﺍ ﻻ ﻳﺨﺮﺝ ﻋﻠﻴﻨﺎ ﺍﺳﺎﻣﺔ ﺩﺍﺅﺩ ﻭﻻ ﻧﺎﺩﺭ ﺍﺑﺮﺍﻫﻴﻢ ﻣﺎﻟﻚ ﻭﻻ ﺁﻝ ﺍﻟﻨﻔﻴﺪﻱ .. ﻭﻭﺍﺳﻤﺎﺀ ﻛﺜﻴﺮﺓ ﻻ ﺗﺤﻀﺮﻧﻲ ﺍﻵﻥ .. ﻟﻤﺎﺫﺍ ﻻ ﺗﻜﻮﻥ ﻫﻨﺎﻙ ﻣﻨﺢ ﻭﻣﺆﺳﺴﺎﺕ ﺗﺮﻋﻰ ﻫﺆﻻﺀ ﺍﻟﻄﻼﺏ ﻭﺗﺠﻨﺒﻬﻢ ﺷﺮ ﺍﻟﺴﺆﺍﻝ ﻭﺍﻟﻤﺴﻐﺒﺔ؟ .. ﻛﻞ ﺍﻟﺠﺎﻣﻌﺎﺕ ﺍﻟﻌﺎﻟﻤﻴﺔ ﻋﻨﺪﻣﺎ ﺗﺪﺧﻞ ﺍﻟﻰ ﺻﻔﺤﺘﻬﺎ ﺍﻻﺳﻔﻴﺮﻳﺔ ﺗﺠﺪ ﻫﻨﺎﻙ ﺍﻳﻘﻮﻧﺔ ﺗﻌﻄﻴﻚ ﻣﻌﻠﻮﻣﺎﺕ ﻋﻦ ﻛﻴﻔﻴﺔ ﺍﻟﺘﻘﺪﻳﻢ ﻟﻠﻤﻨﺢ .. ﺳﺘﺠﺪ ﺍﻥ ﻫﻨﺎﻙ ﺍﻟﻜﺜﻴﺮﻳﻦ ﻣﻦ ﺭﺟﺎﻝ ﺍﻻﻋﻤﺎﻝ ﺍﻟﺬﻳﻦ ﻳﺴﺨﺮﻭﻥ ﺍﻣﻮﺍﻟﻬﻢ ﻓﻘﻂ ﻟﻤﺴﺎﻋﺪﺓ ﺍﻟﻄﻼﺏ .. ﻭﻫﻨﺎﻙ ﻣﻦ ﻳﻨﺸﺊ ﻣﺆﺳﺴﺎﺕ ﺧﺎﺻﺔ ﺑﻬﺬﺍ ﺍﻻﻣﺮ .. ﻛﻤﺎ ﺍﻥ ﺍﻟﺠﺎﻣﻌﺔ ﻧﻔﺴﻬﺎ ﺗﻤﻨﺢ ﻣﻘﺎﻋﺪﺍ ﻣﺨﺼﺼﺔ ﻟﺬﻭﻱ ﺍﻻﺣﺘﻴﺎﺟﺎﺕ ﻭﻟﻠﻄﻼﺏ ﺍﻟﻤﺘﻔﻮﻗﻴﻦ ﺍﻛﺎﺩﻳﻤﻴﺎ ﻭﺍﻟﻤﻮﻫﻮﺑﻴﻦ ﻓﻲ ﺍﻟﻤﻨﺎﺷﻂ ﺍﻟﺮﻳﺎﺿﻴﺔ ﻭﺍﻟﺜﻘﺎﻓﻴﺔ ﻣﺜﻞ ﺍﻟﻔﻦ ﻭﺍﻟﺮﺳﻢ ﻭﺍﻟﻨﺤﺖ .. ﻓﺘﻨﺘﻔﻊ ﺍﻟﺒﻼﺩ ﻣﻨﻬﻢ ﺍﺟﻤﻌﻴﻦ
ﺍﺗﻤﻨﻰ ﺍﻥ ﺗﺼﻞ ﺭﺳﺎﻟﺘﻲ ﺍﻟﻰ ﻣﺪﻳﺮﺓ ﺟﺎﻣﻌﺔ ﺍﻟﺨﺮﻃﻮﻡ .. ﻭﻣﻌﺎﻟﻲ ﻭﺯﻳﺮﺓ ﺍﻟﺘﻌﻠﻴﻢ ﺍﻟﻌﺎﻟﻲ . ﺍﻟﺘﻐﻴﻴﺮ ﻳﺒﺪﺃ ﻣﻦ ﺗﺮﻙ ﺛﻘﺎﻓﺔ ﺍﻟﺘﺮﺑﺢ ﻓﻲ ﺭﺳﺎﻟﺔ ﺍﻟﺘﻌﻠﻴﻢ .. ﻻ ﻟﻮﺍﺩ ﺍﻻﺣﻼﻡ .. ﻻ ﻟﻠﺘﻔﺮﻗﺔ ﺍﻟﻄﺒﻘﻴﺔ ﻓﻲ ﻓﺮﺹ ﺍﻟﺘﻌﻠﻴﻢ .. ﻭﺍﺧﻴﺮﺍ ﻭﻟﻴﺲ ﺁﺧﺮﺍ ﺭﺟﺎﺀ ﺍﻭﻗﻔﻮﺍ ﺩﻣﻮﻉ ﺍﻟﺮﺟﺎﻝ .
ﺍﻟﺠﺮﻳﺪﺓ