• إثنان لا يشبعان أبداً … )النار/ المحليات(
– والله النار تشبع المحليات ما تشبع !
• إثنان يرسخان للفساد )التسوية /التحلل(؟
– القانون ده مالو؟ عيبوهو ليا !
• إثنان يتزاوغ منهما المواطن ويعمل ليهم خارطة طريق )سيد البقالة/ شرطي المرور(
– سيد البقالة مرة في الشهر لكن شرطي المرور ده يوميا
• إثنان يرفع الدعم عنهما سنوياً )الرغيف/مشتقات البترول(
– نطالب برفع الدعم نووهاايئ ..عشان نشوف أها تاني في شنووو؟
• إثنان لا يشبعان )طالب علم/طالب مال(
– طالب العلم إحتمال يشبع ورأسو يتملي لكن الكروش دي البيملاها شنوووو
• إثنان لا تنساهما أبداً )الحساب/النار(
– الزول البنسى الإتنين ديل بيكون غايتو باالغ … يراجع نفسو فوراً
• إثنان صارا الوجبة الرئيسة لمعظم المواطنين )الطعمية/فول الحاجات(
– ده في أحسن الأحوال .. حليل المحاشي والشواءات أضحت أثراً بعد عين
• إثنان تركتهما الأسر السودانية )صينية الغداء/شاي المغربية(
– والإتنين كانو مهمات لأنهما إجتماعات أسرية يومية – الله يجازي الكان السبب
• إثنان لينا زمن ما سمعناهم )تهليل/تكبير(
– أفيدونا … يكون الحاصل شنو يا ربي ؟؟
• إثنان عودتهما مستحيلة )حديقة الحيوان/خط هيثرو(
• حديقة الحيوان ترجع خط هيثرو ما يرجع .. معقولا )عشرة سنين( عاملين رايحين!
• إثنان لا يهمهما دخول الزون )لاعب الحريق/الحاكم(
– في الحالتين يعني ح يحصل شنووو .. ما بس الزول ح يطلع يتفرج
• إثنان لا يمكن النظر إليهما بالعين المجردة )الأميبا/الرغيف(
– الرغيف بعد شوية ح يكون حقنة في العضل .. بس اصبروا
• إثنان لا تقربهما )النار/البنوك(
– البنوك خلت شغلا وبقت ذيها وذي الدلالية .. لو عاوز )شبشب( ممكن يدوك مرابحة
• إثنان لا تنظر إليهما خال إستيقاظك صباحاً )حافظة النقود/عداد الجمرة(
– الإتنين لو لقيت الرصيد شوية ح يحبطوك
• إثنان نبحث عنهما فلا نجدهما )المواصلات/الشريعة(
– هنالك جائزة قيمة لمن يجد الثانية !
• إثنان سبب خسائرنا الكروية خارجياً )التحكيم/ الميدان مبتل(
– بس معقولا يكونوا اللاعبين ؟ !
• إثنان تجدهما في أي مذيعة سودانية )البياض/الكشاكيش(
– على شرط أن عدد الغوايش يتناسب عكسياً مع معرفتها باللغة العربية
• إثنتان تلازمان المطربين في برنامج أغاني وأغاني )التفرشخ في القعدة/الضحك بلا سبب(
– والله حكاية التفرشخ دي محيرة العبدلله ، المرة الجاية دربوهم على القعدة المهذبة .. خاصتن المطرب داك !
• إثنان يأتيان فجأتن )الخريف/الجلطة(
– أها الخريف الجاي إكتملت التجهيزات ذي كل مرة ههههه؟
• إثنان لا يتعلمان )المستحى/المتكبر(
– والغبى برضو
• إثنان يطرشنا قبل كده ما سمعنا بيهم )التوالي/التحلل(
– الناس دي بتجيب الحاجات دي من وين؟
• إثنان لا تخلو منها شوارعنا )القمامة/الحفر(
– حاجة تسد النفس !
• إثنان لو إختفوا من حياتنا كان الحال إنعدل )الإجتماعات/اللجان(
– كيف لكن يختفوا مع الحوافز دي؟
• إثنان من أنواع العيادات عايزة نظرة من السلطات )عيادات الأعشاب/عيادات الرقية(
– تكاثرت بشكل فظيع دون حسيب أو رقيب
• إثنان إذا فسدا فسدت الأمة وإذا صلحا صلحت الأمة )العلماء/الأمراء(
– كتب التراث القالت كده !
• إثنتان من الوزارات إذا ألغيتا فلن تتأثر الدولة )السياحة/البنى التحتية(
– لا توجد سياحة ولا توجد بنى تحتية ومع إرتفاع أسعار اللحوم المهول كمان تمشي معاهم الثروة الحيوانية
• إثنان أصبح تناولهما مستحيل )الفواكة/اللحوم(
• الشعب بقى ناقص فايتمينات أقل نزلة )برد( عاوزه ليها شهرين عشان تروح بعلاج يفوق ال300 ألف !!
• إثنان إذا إرتفعا فلن ينخفضا )الدولار/الأسعار(
– ولااا بالصدمة ذاااتو
• إثنان أصبحت أعدادهما مخيفة )المطربين/المتسولين(
– شوفو صالات الأفراح .. وشارات المرور !
• إثنان لابد أن تجدهما في منزل أي مسؤول )برادو مظللة/بوكس دبل كاب(
• البرادو لسيادتو والدبل كاب للعيال )ولو شالوهم منهم أهو دي دقني؟(
• إثنتان من المهن إندثرتا )الخاطبة/ البصلح العناقريب(
• حليل )الخطبة( وحليل العناقريب !
كسرة :
• إثنان من الألقاب العلمية فقدا بريقهما )دكتور/بروفيسور(
– خلوها بس مستووووورة !! والله تغيب من الزول أسبوع تلاقيهو خاتي ليهو )دال( قدام إسمو … خاصتن الجماعة !!
تنبيه :
يوجد واو جديد )الفورة مليون( !
كسرة ثابتة )قديمة( :
أخبار ملف خط هيثرو العند النائب العام شنو )وووووووووووو(+ )وووووووووووو(+ )وووووووووووو(+ )وووووووووووو(+ )وووووووووووو(+ )وووووووووووو(+ )وووووووووووو(+)وووووووووووو(+و+و+و+و+و+و+و
• كسرة ثابتة )جديدة(
أخبار تنفيذ توجيهات السيد الرئيس بخصوص ملف خط هيثرو شنو )وووووووووووو(+ )وووووووووووو(+ )وووووووووووو(+وووووووووووو(+)وووووووووووو(+و+و+و+و+و+و+و+و
