يحتاج المواطن من حكومته بضع من (ميمات)، منها مسكن، ملبس، مشفى، مدرسة، مطعم، متجر وموظف شريف يقضي له حاجة، سمعت أحدهم يقول (ياعمك ما تنسى متنزه) فقلت له كدي خلي الحكومة توفر ليكم الضروريات، الكماليات ملحوقة!!
(1) برنامجكم شنو؟
أيتها المعارضة الحالمة (المعارضة لحكومة الفترة الانتقالية) اسقاط الحكومة لا يكون بالتمني ولا بالمؤتمرات الصحفية، ولا بالصراخ على مواقع التواصل الاجتماعي ولكنه يكون بما وقر في القلب وصدقه العمل ورأه الناس!! أها برنامجكم شنو؟
(2) أين تاريخكم؟
هل تعلم عزيزي القارئ أعزك الله ونصر بك السودان والسودانيين على الكيزان وفلولهم، فهل تعلم أن أي تلميذ بالسودان وفي مرحلة الأساس يحفظ عن ظهر قلب (ورئه) أسماء أندية كرة القدم العالمية، ويعرف أسماء اللاعبين الكبار، ويعرف أفراد أسرته ويعرف المدربين وايضا اللاعبين العرب في تلك الأندية، كما يعرف أسماء كثير من المسلسلات التركية والمدبلجة، ويعرف اسماء الممثلين والممثلات، وايضا يعرف أسماء المغنيين العرب والعجم منهم، ولكنه جاهل باسماء ابطال الحركات الوطنية السودانية التي حاربت المحتل (الانجليزي والتركي والمصري) وجاهل بأسماء المعارك التي خاضوها، والعيب بالضرورة من المصدر اي من المنهج الدارسي ومن الذين افتوا بأن مادة التاريخ مادة اختيارية في المدارس الثانوية!! فمن شاء درسه ومن شاء تركه وراء ظهره فويل لأمة غير جادة في تدريس تاريخها.
(3) الغناء بالاكتاف
أصبح غالبية من ينتسبون (زورا وبهتانا وافكا) الى الوسط الغنائي، يمارسون الغناء على طريقة هز الاكتاف والارداف، وهز أشياء أخرى لا يجوز كتابتها إلا بعد موافقة مجلس الأمن أو الجمعية العامة للأمم المتحدة!! فما أصعب وأقسى أن ينزل الغناء والاستماع والتطريب من الأذن النظيفة الى الأرجل!!
(4) الفانوس السحري
أثناء مروري بشارع بيتنا، وأنا أردد سنعبر وسنحاكم كل قتلة الشهداء وسنطالب النائب العام (الجديد) بتقديم الملفات التي بمكتب (النائب المستقيل) الى المحاكم، فجأة شاهدت فانوس مرمي في طرف الشارع فتذكرت حكاية الفانوس السحري فقلت (كدي نجرب) فامسكت الفانوس ومسحت عليه ثلاث مرات فخرج دخان كثيف ثم تحول الدخان الى مارد كبير وقال لي (شبيك لبيك خادمك بين يديك طلباتك شنو)؟ فقلت بس اتحلت بلا لجنة اديب بلا لمة، وقلت له شوف ياسيد أنا داير اعرف الناس الفضو اعتصام القيادة العامة بالخرطوم وباقي الولايات ديل منو؟ فحك المارد رأسه وقال لي: شوف يا اخينا لو عاوز سيارة أوباما 2021 بجيبا ليك، لو داير دهب بجيبو ليك، لو داير أي حاجه في الدنيا دي بجيبا ليك لكن اعفيني من الناس الفضو الاعتصام انا داير اعيش!! وقوم عليك الله اضربني في صنقوري دا خليني ادخل في فانوسي بدل ما تدخلني في اضافري بطلبك المستحيل دا!! والمارد يدخل الى فانوسه قلت حتى أنت خائف تجيب سيرة واسماء القتلة والجزارين؟
