ﺗﻔﺘﻴﺶ ﻏﻨﺎﺋﻲ ..!!

ساخر سبيل
الفاتح جبرا
ﺗﻔﺘﻴﺶ ﻏﻨﺎﺋﻲ ..!!

ﺃﻧﺸﺌﺖ ﻣﺤﺎﻛﻢ ﺍﻟﺘﻔﺘﻴﺶ ﻛﻤﺎ ﺗﻘﻮﻝ ﻛﺘﺐ ﺍﻟﺘﺄﺭﻳﺦ ﻓﻲ ﻋﺎﻡ 1233 ﻡ ‏( ﺃﻱ ﻗﺮﻳﺒﺎً ﻣﻦ ﻣﻨﺘﺼﻒ ﺍﻟﻘﺮﻥ ﺍﻟﺜﺎﻟﺚ ﻋﺸﺮ ‏) ﻭﺫﻟﻚ ﺑﻘﺮﺍﺭ ﻣﻦ ﺍﻟﺒﺎﺑﺎ ﺟﺮﻳﻨﻮﺍﺭ ﺍﻟﺘﺎﺳﻊ ﻭﻗﺪ ﻛﺎﻥ ﻫﺪﻓﻬﺎ ﻫﻮ ﻣﺤﺎﺭﺑﺔ ‏( ﺍﻟﻬﺮﻃﻘﺔ ‏) ﺃﻱ ﺍﻟﺰﻧﺪﻗﺔ ﻓﻲ ﻛﻞ ﺑﻠﺪﺍﻥ ﺍﻟﻌﺎﻟﻢ ﺍﻟﻤﺴﻴﺤﻲ ﻭﺍﻟﻬﺮﻃﻘﺔ ﺍﻟﻤﻘﺼﻮﺩ ﺑﻬﺎ ﺃﻱ ﺍﻧﺤﺮﺍﻑ ‏( ﻭﻟﻮ ﻗﻠﻴﻞ ‏) ﻋﻦ ﺍﻟﻤﻌﺘﻘﺪﺍﺕ ﺍﻟﻤﺴﻴﺤﻴﺔ ﺍﻟﺮﺳﻤﻴﺔ ﺍﻟﻤﻌﺮﻭﻓﺔ ﺁﻧﺬﺍﻙ .
ﻭﻗﺪ ﺗﻢ ﺗﻜﻠﻴﻒ ‏( ﺭﺟﺎﻝ ﺍﻟﺪﻳﻦ ‏) ﻓﻲ ﺃﻱ ﻣﻜﺎﻥ ‏( ﺃﻱ ﻣﺤﻠﻴﺔ ﻳﻌﻨﻲ ‏) ﻓﻲ ﻣﺨﺘﻠﻒ ‏( ﺍﻟﻮﻻﻳﺎﺕ ‏) ﻓﻲ ﻛﻞ ﺍﻟﻌﺎﻟﻢ ﺍﻟﻤﺴﻴﺤﻲ ﺑﻤﻼﺣﻘﺔ ﺍﻟﻤﺸﺒﻮﻫﻴﻦ، ﻭﻋﻴﻨﻚ ﻣﺎ ﺗﺸﻮﻑ ﺇﻻ ﺍﻟﻨﻮﺭ ﺣﻴﺚ ﻳﻜﻔﻲ ﺃﻥ ﻳﺸﻲ ﺃﺣﺪﻫﻢ ﺑﻚ ﻗﺎﺋﻼً : ‏( ﺍﻟﺰﻭﻝ ﺩﻩ ﻣﻬﺮﻃﻖ ‏) ﻭﻳﺒﻘﻰ ﻋﻠﻰ ﻛﺪﻩ ‏( ﻣﻮﺿﻮﻋﻚ ﺇﻧﺘﻬﻰ ‏) ، ﻓﻘﺪ ﻛﺎﻥ ﺍﻟﻨﺎﺱ ﻳﺴﺎﻗﻮﻥ ﺇﻟﻰ ﻣﺤﺎﻛﻢ ﺍﻟﺘﻔﺘﻴﺶ ‏( ﺑﺎﻟﺸﺒﻬﺔ ﻓﻘﻂ ‏) ﺣﻴﺚ ﻛﺎﻥ ‏( ﺍﻟﻤﺸﺘﺒﻪ ﻓﻴﻪ ‏) ﻳﺘﻌﺮﺽ ﻟﻼﺳﺘﺠﻮﺍﺏ ﺣﺘﻰ ﻳﻌﺘﺮﻑ ﺑﺬﻧﺒﻪ ‏( ﻛﻤﺮﺣﻠﺔ ﺃﻭﻟﻰ ‏) ﻓﺈﺫﺍ ‏( ﻋﺎﻭﺯ ﻳﻌﻤﻞ ﻣﻔﺘﺢ ‏) ﻭﻟﻢ ﻳﻌﺘﺮﻑ ﻓﻠﻴﺴﺘﻌﺪ ‏( ﻟﻠﻄﻴﺎﺭﺓ ﻗﺎﻣﺖ ‏) ﻭ ‏( ﺃﺭﻧﺐ ﻧﻂ ‏) ﻭﺟﻤﻴﻊ ﺃﻧﻮﺍﻉ ﺍﻟﺘﻌﺬﻳﺐ ﺍﻟﺘﻲ ﻛﺎﻧﺖ ﻣﺴﺘﺨﺪﻣﺔ ﻓﻲ ﺫﻟﻚ ﺍﻟﺰﻣﺎﻥ ﺍﻟﺒﻌﻴﺪ، ﻭﻗﺪ ﻛﺎﻥ ﺍﻟﻜﺜﻴﺮﻭﻥ ﻣﻦ ﻓﺮﻁ ﺍﻟﺘﻌﺬﻳﺐ ﻳﻨﻬﺎﺭﻭﻥ ﻭﻳﻌﺘﺮﻓﻮﻥ ﻟﻴﻮﺍﺟﻬﻮﺍ ﻣﺼﻴﺮﻫﻢ ﺍﻟﻤﺤﺘﻮﻡ !
ﻭﻣﻦ ﺃﺷﻬﺮ ﺍﻟﺬﻳﻦ ﻣﺎﺗﻮﺍ ﺣﺮﻗﺎً ﺍﻟﻤﺼﻠﺢ ﺍﻟﺘﺸﻴﻜﻲ ﻭﺍﻟﺮﺍﻫﺐ ﺍﻟﻤﺸﻬﻮﺭ ﺟﺎﻥ ﻫﻮﺱ ﺍﻟﺬﻱ ﻛﺎﻥ ﻋﻤﻴﺪﺍً ﻟﺠﺎﻣﻌﺔ ﺑﺮﺍﻍ ﻓﻲ ﺑﺪﺍﻳﺔ ﺍﻟﻘﺮﻥ ﺍﻟﺨﺎﻣﺲ ﻋﺸﺮ ﻭﻣﻦ ﺃﻫﻢ ﺍﻟﺬﻳﻦ ﻣﺜﻠﻮﺍ ﺃﻣﺎﻡ ﻣﺤﺎﻛﻢ ﺍﻟﺘﻔﺘﻴﺶ ﺍﻟﻌﺎﻟﻢ ﺍﻟﺸﻬﻴﺮ ﺟﺎﻟﻴﻠﻴﻮ ‏( ﺍﻟﻘﺎﻝ ﺇﻧﻮ ﺍﻷﺭﺽ ﺑﺘﺘﺤﺮﻙ ‏) ﻭﺍﻟﺬﻱ ﻛﺎﻥ ﻣﻬﺪﺩﺍً ﺑﺎﻟﺤﺮﻕ ﻟﻮﻻ ﺃﻧﻪ ﺍﺳﺘﺪﺭﻙ ﺍﻷﻣﺮ ﻓﻲ ﺁﺧﺮ ﻟﺤﻈﺔ ﻭﺗﺮﺍﺟﻊ ﻋﻦ ﻧﻈﺮﻳﺘﻪ ﺍﻟﻤﺸﻬﻮﺭﺓ ﺣﻴﺚ ﺗﻢ ﺍﻟﻌﻔﻮ ﻋﻨﻪ ﻫﺬﺍ ﻭﻟﻢ ﺗﻌﺘﺮﻑ ﺍﻟﻜﻨﻴﺴﺔ ﺍﻟﻜﺎﺛﻮﻟﻴﻜﻴﺔ ﺑﻐﻠﻄﺘﻬﺎ ﻓﻲ ﺣﻖ ﺟﺎﻟﻴﻠﻴﻮ ﺇﻻ ﺑﻌﺪ ﻣﺮﻭﺭ ﺃﻛﺜﺮ ﻣﻦ ﺛﻼﺛﻤﺎﺋﺔ ﺳﻨﺔ ﻋﻠﻰ ﻣﺤﺎﻛﻤﺘﻪ، ﻭﻗﺪ ﺍﺳﺘﻤﺮﺕ ﻣﺤﺮﻗﺔ ﻣﺤﺎﻛﻢ ﺍﻟﺘﻔﺘﻴﺶ ﻣﺘﻘﺪﺓ ﺣﺘﻰ ﺍﻟﻘﺮﻥ ﺍﻟﺜﺎﻣﻦ ﻋﺸﺮ ﻣﺜﺎﻻً ﻷﻛﺜﺮ ﻣﺆﺳﺴﺎﺕ ﺍﻟﺒﺸﺮﻳﺔ ﺍﻟﺴﻴﺌﺔ ﺍﻟﺼﻴﺖ ﻋﻠﻰ ﻣﺮ ﺍﻟﻌﺼﻮﺭ ﻭﺍﻷﺯﻣﺎﻥ !
ﻃﻴﺐ ﺣﻜﻴﻨﺎ ﺍﻟﻜﻼﻡ ﺩﻩ ﻟﻴﻪ؟
ﺗﺬﻛﺮﺕ ﻣﺤﺎﻛﻢ ‏( ﺍﻟﺘﻔﺘﻴﺶ ‏) ﻭﺃﻧﺎ ﺃﻗﺮﺃ ﺧﺒﺮﺍً ﺑﺼﺤﻒ ﺍﻷﻣﺲ ﻭﻫﻮ ﺗﺼﺮﻳﺢ ﻋﻠﻰ ﻟﺴﺎﻥ ﺍﻷﺥ ﺍﻷﺳﺘﺎﺫ ﻋﻠﻲ ﻣﻬﺪﻱ ﻧﻮﺭﻱ ‏( ﺭﺋﻴﺲ ﻣﺠﻠﺲ ﺍﻟﻤﻬﻦ ﺍﻟﻤﻮﺳﻴﻘﻴﺔ ‏) ﻳﻘﻮﻝ ﻓﻴﻪ ﺃﻧﻬﻢ ﻳﻌﺘﺰﻣﻮﻥ ﺍﻟﻘﻴﺎﻡ ﺑﺤﻤﻼﺕ ﻟﺘﻔﺘﻴﺶ ﺍﻹﺫﺍﻋﺎﺕ ﺑﺤﺜﺎً ﻋﻦ ﺍﻷﻏﺎﻧﻲ ﺍﻟﻬﺎﺑﻄﺔ، ﺣﻴﺚ ﺇﺳﺘﻐﺮﺷﺖ ﻏﺎﻳﺔ ﺍﻹﺳﺘﻐﺮﺍﺵ ﻟﻤﺴﺄﻟﺔ ﺗﻔﺘﻴﺶ ﺍﻹﺫﺍﻋﺎﺕ ﺩﻱ ﻭﻃﺎﻓﺖ ﺑﺬﻫﻨﻲ ﺳﻴﻨﺎﺭﻳﻮﻫﺎﺕ ﻋﺪﻳﺪﺓ ﺗﺸﺎﺑﻪ ﺇﻟﻰ ﺣﺪ ﺑﻌﻴﺪ ﺗﻔﺘﻴﺶ ﺍﻟﻤﺘﻬﻤﻴﻦ ﺑﺤﻴﺎﺯﺓ ‏( ﺍﻟﺨﻤﻮﺭ ‏) ﻭﻫﻢ ﻳﺨﺮﺟﻮﻥ ﻣﻦ ‏( ﻧﻘﺎﻁ ﺍﻟﺒﻴﻊ ‏) ﺑﻌﺪ ﺃﻥ ‏( ﺗﻠﺒﺪ ‏) ﻟﻬﻢ ﺍﻟﺤﻜﻮﻣﺔ !
ﻓﻤﺎ ﺃﻥ ﻳﺪﺧﻞ ‏( ﺗﻴﻢ ‏) ﺍﻟﺘﻔﺘﻴﺶ ﺇﻟﻰ ﺇﺫﺍﻋﺔ ‏( ﻳﺎﺍﺍﻱ ﺃﻑ ﺃﻡ ‏) ﺣﺘﻰ ﻳﻘﻮﻡ ﺭﺋﻴﺲ ﺍﻟﺘﻴﻢ ﻭﺃﻋﻼﻫﻢ ﺭﺗﺒﺔ ﺑﺘﻮﺟﻴﻪ ﺃﻓﺮﺍﺩﻩ :
ﺇﺗﻨﻴﻦ ﻳﺪﺧﻠﻮ ﺍﻟﺒﺚ ﺍﻟﻤﺒﺎﺷﺮ ﺍﻟﻤﺒﺎﺷﺮ، ﻭﺗﻼﺗﻪ ‏( ﺍﻟﻤﻜﺘﺒﺔ ‏) ﻭﺃﺗﻨﻴﻦ ﻳﻘﻴﻔﻮ ﻓﻲ ﺍﻟﺒﺎﺏ ﻫﻨﺎ ﻋﺸﺎﻥ ﻣﺎﻓﻲ ﺯﻭﻝ ﻳﻄﻠﻊ ﻟﻴﻬﻮ ﺑﻲ ﺃﻏﻨﻴﺔ ﻭﻟﻼ ‏( ﻛﻮﺑﻠﻴﻪ !( ﻭﻣﺎ ﺃﻥ ﺗﻨﺘﺸﺮ ‏( ﺍﻟﻘﻮﺍﺕ ‏) ﻓﻲ ﻣﺒﻨﻲ ﺍﻹﺫﺍﻋﺔ ﺣﺘﻰ ﻳﺼﻴﺢ ﺭﺋﻴﺲ ﺍﻟﺘﻴﻢ ﺑﺼﻮﺕ ﺟﻬﻮﺭﻱ :
‏( ﺍﻟﺤﺘﺔ ﺩﻱ ‏) ﻣﺪﻳﺮﺍ ﻭﻳﻦ؟
ﻭﻫﻨﺎ ﺗﺘﺪﺧﻞ ﺇﺣﺪﻯ ﺍﻟﻤﺬﻳﻌﺎﺕ ‏( ﻓﺎﻋﻠﺔ ﺧﻴﺮ ﻭﻛﺪﻩ ‏) :
ﻭﺍﻟﻠﻪ ﺍﻟﻤﺪﻳﺮ ﺩﻩ ﺃﻋﺘﻘﺪ ﺇﻧﻮ ..……………………
ﻭﻟﻜﻦ ﻗﺒﻞ ﺃﻥ ﺗﻜﻤﻞ ﺣﺪﻳﺜﻬﺎ ﺗﻔﺎﺟﺄ ﺑﺮﺋﻴﺲ ﺍﻟﻤﺠﻤﻮﻋﺔ ﻳﺨﺎﻃﺒﻬﺎ ﺻﺎﺭﺧﺎً :
ﺃﻳﻮﺍﺍﺍﺍ ﺃﻧﺘﻲ ﻣﺶ ‏( ﻧﺪﻯ ﻣﺎﻳﻜﺎﺕ ‏) ﺍﻟﻤﺬﻳﻌﺔ ﺑﺘﺎﻋﺖ ﺑﺮﻧﺎﻣﺞ ‏( ﻃﻴﻮﺭ ﺍﻟﻤﺤﺒﺔ ‏) .. ﺃﻗﻴﻔﻲ ﺑﻲ ﺟﺎﻱ ﻧﺤﻨﺎ ﺫﺍﺍﺍﺗﻮ ﺩﺍﻳﺮﻧﻚ ‏( ﻭﻫﻮ ﻳﺘﻤﻌﻨﻬﺎ ‏) : ﻭﻛﻤﺎﻥ ﻻﺑﺴﺔ ﺑﻨﻄﻠﻮﻥ !
ﻻ ﻳﻠﺒﺚ ‏( ﻣﺪﻳﺮ ﺍﻹﺫﺍﻋﺔ ‏) ﺃﻥ ﻳﺪﻟﻒ ﺇﻟﻰ ﺩﺍﺧﻠﻬﺎ ﻓﻴﻔﺎﺟﺄ ﺑﺘﻴﻢ ﺍﻟﺘﻔﺘﻴﺶ :
‏( ﻣﻨﺪﻫﺸﺎً ‏) : ﺍﻟﺴﻼﻡ ﻋﻠﻴﻜﻢ، ﻳﺎ ﺟﻤﺎﻋﺔ ﻣﺎﻟﻜﻢ؟ ﻓﻲ ﺷﻨﻮﻭﻭﻭ؟
ﺷﻨﻮ ﺍﻟﻔﻲ ﺷﻨﻮﻭ؟ ﻳﻌﻨﻲ ﻣﺎ ﻋﺎﺭﻑ؟ ﺑﻜﺎﻧﺎ ﻭﻳﻦ ﻳﺎ ﺯﻭﻝ؟
ﻫﻲ ﺷﻨﻮﻭﻭ ﺍﻟﺒﻜﺎﻧﺎ ﻭﻳﻦ؟
ﺍﻷﺯﻣﺔ ﺃﻗﺼﺪ ﺍﻷﻏﺎﻧﻲ ﺍﻟﻬﺎﺑﻄﺔ
ﻳﺎ ﺟﻤﺎﻋﺔ ﻭﺍﻟﻠﻪ ﻣﺎ ﻋﻨﺪﻧﺎ ﺃﻱ ﺃﻏﺎﻧﻲ ﻫﺎﺑﻄﺔ !
ﻣﺎ ﻋﻨﺪﻛﻢ ﻛﻴﻒ .. ﺃﻣﺒﺎﺭﺡ ﺩﻱ ﻣﺶ ﻛﻨﺘﻮ ﺍﻟﺼﺒﺎﺡ ﻣﺸﻐﻠﻴﻦ ﺃﻏﻨﻴﺔ ﺍﻟﻤﻄﺮﺑﺔ ﻋﻠﻮﻳﺔ ﺑﺎﻏﺎﺕ ﺍﻟﺒﺘﻘﻮﻝ ‏( ﻟﻤﺎ ﺟﻴﺖ ﺍﻟﺒﻴﺖ ﻛﺎﻥ ﺗﻨﻂ ﺑﺎﻟﺤﻴﻂ !(
ﺩﻳﻞ ﻭﺍﻟﻠﻪ ﻳﺎ ﺭﻳﺲ ﻣﺎ ﻧﺤﻨﺎ ﺩﻱ ﺗﻜﻮﻥ ﺇﺫﺍﻋﺔ ﺗﺎﻧﻴﺔ !
‏( ﻓﻲ ﺻﺮﺍﻣﺔ ‏) : ﺇﺫﺍﻋﺔ ﺗﺎﻧﻴﺔ ﻛﻴﻒ؟ ﻭﺃﻧﺎ ﻣﺎ ﺑﺴﻤﻊ ﻏﻴﺮ ﺇﺫﺍﻋﺘﻜﻢ ﺩﻱ؟ ﻓﺘﺸﻮﺍ ﺍﻟﺰﻭﻝ ﺩﻩ ﺷﻮﻓﻮ ﻋﻨﺪﻭ ﺃﻱ ﺃﻏﻨﻴﺔ ﻫﺎﺑﻄﺔ ﺃﻋﻤﻠﻮ ﻟﻴﻬﻮ ‏( ﺣﻴﺎﺯﺓ ‏) .
ﻳﺎ ﺟﻤﺎﻋﺔ ﺃﻧﺎ ﺫﺍﺗﻮ ﻣﻮﺑﺎﻳﻞ ﻣﺎ ﻗﺎﻋﺪ ﺃﺷﻴﻠﻮ
ﻣﻮﺑﺎﻳﻞ ﺷﻨﻮ ﻣﺶ ﻣﻤﻜﻦ ﺗﻜﻮﻥ ﺷﺎﻳﻼ ‏( ﻣﻜﺘﻮﺑﺔ !(
ﺑﻴﻦ ﺍﻟﻔﻴﻨﺔ ﻭﺍﻵﺧﺮﻯ ﻳﻘﻮﻡ ﺭﺋﻴﺲ ‏( ﺍﻟﺘﻴﻢ ‏) ﺑﺎﻹﻧﺰﻭﺍﺀ ﺑﻌﻴﺪﺍً ﻭﻫﻮ ﻳﻀﻊ ﺟﻬﺎﺯ ﺍﻟﻼﺳﻠﻜﻲ ﻣﺨﺎﻃﺒﺎُ ‏( ﺍﻟﻌﺮﺑﺔ ‏) ﺍﻟﺘﺎﺑﻌﺔ ﻟﻠﺘﻴﻢ ﺍﻟﺘﻲ ﺗﻘﻒ ﺧﺎﺭﺝ ﻣﺒﻨﻰ ﺍﻹﺫﺍﻋﺔ :
ﺃﻟﻮ .. 121 ﺕ ﻳﺘﻜﻠﻢ
220 ﻁ ﻣﻌﺎﻙ .. ﺳﺎﻣﻌﻚ ﻳﺎ ﺭﺋﻴﺲ
ﺧﻠﻴﻜﻢ ﺿﺎﺑﻄﻴﻦ ﺭﺍﺩﻳﻮ ﺍﻟﻌﺮﺑﻴﺔ ﻋﻠﻰ ﻣﻮﺟﺔ ‏( ﺍﻟﻬﺪﻑ ‏) ﻧﺤﻨﺎ ﻓﻲ ‏( ﺍﻟﻤﻮﻗﻊ ‏) .. ﻗﺪﺍﻡ ﺃﺳﺘﺪﻳﻮ ﺍﻟﺒﺚ ﺍﻟﻤﺒﺎﺷﺮ .. ﺃﻭﻝ ﻣﺎ ﻳﺒﺜﻮﺍ ﺃﻏﻨﻴﺔ ﻫﺎﺑﻄﺔ ‏( ﺃﺭﺳﻞ ‏) ﻋﺸﺎﻥ ﻧﻘﻮﻡ ﺑﺎﻟﻬﺠﻮﻡ ﻭﻧﻘﺒﻀﻬﻢ ﺑﺎﻟﺜﺎﺑﺘﺔ
ﺣﺎﺿﺮ ﻳﺎ ﺭﻳﺲ !
ﻳﻌﻮﺩ ﺭﺋﻴﺲ ﺍﻟﺘﻴﻢ ﻟﻴﻘﻒ ﺃﻣﺎﻡ ﺑﺎﺏ ﺃﺳﺘﺪﻳﻮ ﺍﻟﺒﺚ ﺍﻟﻤﺒﺎﺷﺮ ﺑﻌﺪ ﺃﻥ ﺟﻤﻊ ﻛﺎﻓﺔ ﺍﻟﻌﺎﻣﻠﻴﻦ ﺑﺎﻹﺫﺍﻋﺔ ﺃﻣﺎﻣﻪ ﻭﻫﻢ ﻓﻲ ﺣﺎﻟﺔ ﻭﺟﻮﻡ :
ﺃﻫﺎ ﺍﻟﻠﻴﻠﺔ ﺗﻤﺸﻮﺍ ﻭﻳﻦ .. ﻛﺪﻱ ﺑﺲ ﺧﻠﻮ ﺍﻟﻤﺬﻳﻊ ﺍﻟﺠﻮﻩ ﺩﻩ ﻳﺬﻳﻊ ﻟﻴﻬﻮ ﺃﻏﻨﻴﺔ ﻫﺎﺑﻄﺔ !
ﻳﺨﻴﻢ ﺍﻟﺴﻜﻮﻥ ﻭﺍﻟﺨﻮﻑ ﻋﻠﻰ ﺍﻟﺠﻤﻴﻊ ﺛﻢ ﻓﺠﺄﺓ ﻳﻨﻄﻠﻖ ﺻﻮﺕ ﻋﻠﻮﻳﺔ ﺑﺎﻏﺎﺕ ‏( ﻟﻤﺎ ﺟﻴﺖ ﺍﻟﺒﻴﺖ ﻛﻨﺘﺎ ﻋﺎﻭﺯﺍﻙ ﺗﻨﻂ ﺑﺎﻟﺤﻴﻂ ‏) ، ﻳﺘﺼﺒﺐ ﻣﺪﻳﺮ ﺍﻹﺫﺍﻋﺔ ﻋﺮﻗﺎً ﻣﻦ ﺍﻟﺨﻮﻑ .. ﻳﺴﻮﺩ ﺍﻟﺼﻤﺖ ﺍﻟﺠﻤﻴﻊ ﺇﻻ ﻣﻦ ﺻﻮﺕ ﺃﺣﺪ ﺃﻓﺮﺍﺩ ﺍﻟﺘﻴﻢ ﻣﻨﺒﻬﺎً ﺍﻟﺮﻳﺲ :
ﻳﺎ ﺭﻳﺲ ﻣﻮﺑﺎﻳﻠﻚ ﺑﻴﻀﺮﺏ !!

ﻛﺴﺮﺓ :

ﺃﻧﺎ ﺷﺨﺼﻴﺎً ﺗﻌﺠﺒﻨﻲ ﺃﻏﻨﻴﺔ ﺍﻟﻤﻄﺮﺑﺔ ‏( ﺣﻨﺎﻥ ﻣﺲ ﻛﻮﻝ ‏) ﺍﻟﺘﻲ ﺗﻘﻮﻝ :
ﻟﻮ ﺧﻂ ﻫﻴﺜﺮﻭ ﺭﺟﻊ ﺃﻧﺎ ﻣﺎ ﺑﺮﺟﻊ ﻟﻴﻚ
ﺇﻧﺘﺎ ﻗﺎﻳﻠﻨﻲ ﻫﺎﻣﻠﺔ ﻭﻟﻼ ﻟﻌﺒﺔ ﻓﻲ ﺃﻳﺪﻳﻚ
ﺗﺒﻴﻌﻨﻲ ﺑﻴﻌﺔ ﺍﻟﺨــﻂ
ﻭﺗﻜﺴﺮﻧﻲ ﺭﻁ ﺭﻁ ﺭﻁ
ﻳﺎﺍﺥ ﺣــﺮﺍﺍﺍﻡ ﻋﻠﻴﻚ؟

• ﻛﺴﺮﺓ
ﺛﺎﺑﺘﺔ ‏( ﻗﺪﻳﻤﺔ ‏) :

ﺃﺧﺒﺎﺭ ﻣﻠﻒ ﺧﻂ ﻫﻴﺜﺮﻭ ﺍﻟﻌﻨﺪ ﺍﻟﻨﺎﺋﺐ ﺍﻟﻌﺎﻡ ﺷﻨﻮ؟ 102 ﻭﺍﻭ – ‏( ﻟﻴﻬﺎ ﺛﻤﺎﻧﻴﺔ ﺳﻨﻴﻦ ﻭﺳﺘﺔ ﺷﻬﻮﺭ ‏) ؟

• ﻛﺴﺮﺓ
ﺛﺎﺑﺘﺔ ‏( ﺟﺪﻳﺪﺓ ‏) :

ﺃﺧﺒﺎﺭ ﺗﻨﻔﻴﺬ ﺗﻮﺟﻴﻬﺎﺕ ﺍﻟﺴﻴﺪ ﺍﻟﺮﺋﻴﺲ ﺑﺨﺼﻮﺹ ﻣﻠﻒ ﺧﻂ ﻫﻴﺜﺮﻭ ﺷﻨﻮ؟ 61 ﻭﺍﻭ ‏( ﻟﻴﻬﺎ ﺧﻤﺴﺔ ﺳﻨﻴﻦ ﻭﺷﻬﺮ