عديم إحساس..!!
أناني وبس
عديم إحساس وناقص رأي
قايل حواء ما ولّدت ولد غيري
كأنّو الدُنيا جيتا براي
وحاتك ربي يا موّلاي
خالق روحي كُل أعضاي
نسيت الوالد الهدّاي
قُمت لقيتوا ديمة وراي
هم الدُنيا شالو معاي
تعِب فيني
يلهث ديمة يحميني
يطعم فيني شان أشبع
خيرك يابا كان مرتع
أنا النسّاي
نسيت أمي القبيل شالت
تئن كانت بتتوجّع
متين راجياني شان أطلع
تسعد بي تنوم العين
فاتح حُضنها الدافئ
قوم يا روحي هاك أرضع
بين إيديها كُنت أنا
تهدّهِد فيني واللولاي
تدندِن بى خفيض الصوت
تكبر يا عشم دُنياي
أشوفك بُكرة أحسن زول
ترُد الدين .. تنوم العين
تحقّق يا وليدي رجاي
لمّا كبرت ما أوفيت
هجرّت البيت
بعيد سافرت يُمة مشيت
جمعت المال
أصبح عندي برضو عيال
نسيت فضلك علي يابا
لي أمي الحبيبة جفيت
عند الزوجة صار الرأي
تحرِّك فيني زي دُمية
شمال أمشي يمين بى جاي
نسيت روحي وهجرّت الناس
أناني وبس عديم إحساس
ناقص رأي
