اكبر حلة فول في العالم

في السلك

بابكر سلك
*غايتو موسوعة جينيس للارقام القياسية السنة دي اتملت
*ثورتنا سجلت ارقام غير مسبوقة في جميع المجالات
*كان منها انها اكتر ثورة تابعها العالم بدهشة واعجاب
*برغم انها اعلاميا كانت الاعلام العالمي معتم عليها شديد
*برغم كل ذلك سجلت الثورة متابعة وحضور فاق متابعة الناس لي كأس العالم
*اكتر من ستين في المية من البشر في الدنيا دي تابعوا ثورتنا
*وكانت كنداكاتنا ايقونات علي غلاف اكبر المجلات والصحف العالمية
*وكان قطر عطبرة الثورة منبع دهشة واعجاب اوروبا والامريكتين وكندا واستراليا
*وكان اسمها الثورة كان العرس عرس الشباب
*بالامس سجلت ثورتنا رقما قياسيا جديدا
*اكبر مائدة طعام علي مر التاريخ
*ملايين البشر يأكلون من نفس الاناء ونفس الطبق وفي نفس المكان
*وفطور نجهزوا ليك
*ثورة
*حلو مر نكبكبوا ليك
*ثورة
*وكانت اكبر حلة فول في العالم
*فول ماعادي
*فول فنان
*بي عيشو كمان
*ومعاهو زيتو

*رقم سوداني ثورجي جديد يسجل علي صفحات جينيس ولن يحطم في يوم من الايام
*هذه جوانب من عظمة ثورتنا
*ولكن نسأل
*الا يمكن ان نترك مالله لله ومالقيصر لقيصر يا مجلسنا العسكري ويا قوي الحرية؟؟؟
*الا نريد ان نبارح ساحة الاعتصام ونقطة الاختصام لنتوجه لساحات العمل كي نبني وطن ونستعيد حقه المسلوب من حرامية لازالوا ينعمون بالحرية والدرجة الوظيفية الرفيعة ويستمتعون بما سرقهوه مستفيدين من الخلاف والاختلاف وتأخر الوفاق والاتفاق !!!!

*ولكن نسأل
*ايها الناس
*حقو مانضيع دم الشهداء وجهد الثوار ونجاعة الابناء في جدل بيزنطي يضر القضية ولا يخدم الوطن
*وحقو نسجل رقم قياسي جديد باسم الثورة في التفاني لخدمة الوطن والتنازل لاجل الصالح العام
*فبالتأكيد المجلس العسكري لايفتقر لرجل رشيد
*والثورة لاتفتقد للرجال الحكماء والشباب المتقد
*يبقي الاتفاق قريب وحقو مانطول الزمن

*المهم
*كتبت قبل كم يوم عن طلب بعض من اسرة المخلوع استلام الطائرة الرئاسية بادعاء انها هدية للمخلوع
*ذلك الخبر المتداول علي الاسافير
*وقلت ان صح ذلك يبقي الاختشوا فعلا ماتو
*ارسل لي الحبيب اكرم زكي من لندن علي لسان المخلوع العبارة التالية
*يعني بقت ياسلك علي طيارتي الفرد واحده دي؟؟؟
*التحية لاكرم الثورجي الذي عشق الوطن وكتب عنه منذ ان كنا بالمؤتمر الثانوية وحتي اليوم

*يقول اكرم في احدي قصائده
*وطن بعزو باقي
*مكانو في جوه المآقي
*صحيح فقير ريو السواقي
*بس مكانو في نفوسنا باقي
*وبجهودنا حايبقي راقي
*****
*بستغيث في الظلمة صوتو مابغريب حاتكون نجاتو
*بشبابو وبي بناتو
*بعيالو الدابو تاتو
*ومن نفوسنا حاتكون حياتو
****
*يامغيث اديهو خيرك
*ياخبيث حكم ضميرك
*بسرورو يتم سرورك
*من مشاعلو يضوي نورك
*ابني مستقبل حفيدك
*وكتب اكرم للوطن
*باسمك تبدأ حرية يفوح منك عبير ريحان
*فلسطيني ولزنجية وللثوار في كل مكان
*وزيك تبدأ الآلاف تمزق صورة الاجحاف
*وكأن اكرم كتب ذلك اليوم
*تصدقوا الكلام ده مكتوب سنة خمسة وتمنين؟؟؟
*وعشت ياوطن
*ويبقي الاتفاق لاجلك امانة علي اعناق المجلس العسكري والتجمع والثوار في كل مكان
*ايها الناس
*ان تنصروا الله ينصركم
*اها
*نجي لي شمارات والي الخرتوم
*ايه رايك ياوالينا
*لو مجلسنا العسكري يجينا
*ووفد التجمع المفاوض يجينا
*ويفطروا معانا محل صابنها ياوالينا
*عسي الشاي البي جاي يكون معاهو كيكة ومودة وتقريب لوجهات النظر الفيكم وفينا
سلك كهربا ننساك كيف والكلب قال ختوا الكورة واطة ….الفريق الطار ماقاعد بشتكي ساكت…

والي لقاء
سلك